بهلول ودلدول ....... !!!!!

دلدول : وش تبي يا بهلول؟
بهلول : ودي أقابل المسئول.
دلدول : ما تدري ان المسئول مشغول.
بهلول : أدري .. لكن أنت في خدمتنا ولا هذا كلام معسول.
دلدول : طبعاً .. ولا ليش جالسين عند الأبواب ننظم عملية الدخول.
بهلول : جلستكم على الأبواب تدر عليكم خير موصول!
دلدول : تقصد اننا بناخذ معلوم يا بهلول؟
بهلول : لا طبعاً .. لكن انتم بتسهلوا المشاريع لأصحابكم .. ولكم نسبة الدخول!
دلدول : يا أخي حنا نبحث عن الحلول للمسؤول.
بهلول : ومافي في البلد غير شركات أصحابكم هيا اللي تكسب العروض عشان تحقق المأمول!
دلدول : صحيح انكم ما تدرون عن تعبنا .. يا أخي صرنا ما نشوف عيالنا إلا بالمحمول!
بهلول : وحنا عيالنا ملوا من جلوسنا من غير مدخول.
دلدول : راجعوا الجمعيات الخيرية .. تراها فاتحة على طول.
بهلول : نراجع الجمعيات ونترك لكم شرهات القصور!
دلدول : بغبائكم حتعيشوا من غير مستقبل مقبول.
بهلول : يعني ذكائكم هو اللي وفر لكم المال والسيارات اللي تصول وتجول!
دلدول : أنا ما عندي وقت أبرر وأعطي ردود .. الجؤوا للتجارة والاستثمار وشوفوا لكم بزنس معقول.
بهلول : قلت لك يا دلدول .. التجارة والاستثمار لأصحابكم اللي قادرين على الدخول!
دلدول : طيب شوفوا وزارة العمل .. تراها موجودة عشان تخدم السائل والمحروم!
بهلول : وزارة العمل معمول لها عمل ! .. مع الكبار كل شيء جايز ومقبول .. وعلى الصغار سيف مسلول!
دلدول : طيب تاجروا في الأراضي .. ترى مكسبها مضمون.
بهلول : العقاريين أكلوا المساهمات .. وخلوا المتر في الصحاري بألوف!
دلدول : طيب عندكم سوق الأسهم .. تراه راح يصير فوق على طول.
بهلول : كفاية ضحك على الذقون .. عرفنا ان اللي بيربحوا في السوق عددهم محدود!
دلدول : هذا أمر الله .. مافي أحد يقدر يتحكم بالمصير والمكتوب.
بهلول : أرصدتنا طارت وأرصدتكم يغار منها قارون .. خلي الطابق مستور!
دلدول : من الأخير يا بهلول .. ممنوع الدخول على المسؤول.
بهلول : أجل مالي غير الصحافة عشان يوصل صوتي وصوت كل مظلوم.
دلدول : صدقني راح يكون مصيرك مجهول .. لكن أنسى مقابلة المسؤول وأوعدك ما راح تخرج من عندي مخذول!
بهلول : سبحان الله .. لو أتكلمت راح أعيش باقي حياتي منتوف ومذلول .. ولو انكتمت وسكتت راح أعيش باقي حياتي مستور لكن دلدول.